前排朋友同我講起，話覺得有啲曾經都好fucked up嘅人，自己好返之後就睇唔起其他仲fucked up緊嘅人，以一種「我都做得到點解你做唔到」嘅高姿態看待人，變成咗自己以前最討厭嗰種人。
呢種問題係幾難評斷嘅，因為有啲人真係太沉浸喺自己嘅負面情緒之中，過於軟弱同抗拒成長，甚至變成toxic people，令人見到都好難同情；但又有啲人真係太traumatized，佢所經歷嘅嘢根本唔係一般人可以想像，企唔返起身都情有可原，輪唔到啲只係受過小傷/只係有輕微情緒問題嘅人去judge佢哋軟唔軟弱。
作為一個fucked up過來人，我深明嗰種好似喺深淵之中，就算想爬返上去都總會有道力扯返你落去嘅感覺。我之所以脫離到嗰個狀態，除咗食啱藥幫咗好多同受到好嘅人啟發之外，2019都係我心態上嘅一個轉捩點。每當覺得痛苦嘅時候，我都會諗有好多手足受緊更大痛苦，自己或許可以咬緊牙關再tough啲。
呢種心態同以前啲廢老講嗰種「非洲小朋友仲慘啦」唔同，想逼自己tough啲唔係因為喺鬥慘大會中輸九條街，而係喺咁嘅社會環境中，已經唔想將個人情緒睇得太過重，硬淨啲先可以承擔更多嘢，有更大力量去對抗荒謬。
但當然要小心嘅係唔好落入一種「你睇下人哋坐監都咁積極，你就成個廢柴/你唔deserve過得太開心」咁嘅自責模式中。要養傷就好好養傷，接受自己嘅軟弱，但要畀個目標自己，唔好永無止境咁一蹶不振。
To其他曾經fucked up但爬得返起身嘅人：你好叻，做得好好，不過記住要保持同理心，唔好急住同過去嘅自己割席。可能當年都冇人理解你，你亦唔期望有人理解，但唔係人人都可以好似你咁。做個溫柔嘅人，令其他人受少啲傷害，等大家都爬得返起身。
Search